* * *
تحذير بالحرق.. على خفيف كدة
هل المسلسل حلو؟
اه.. بس مش بالاوفر اللي كنت بسمعه، مفيهوش مشاهد قرف ومقززة دموية بالشكل اللي كانوا بيتكلموا عنه ده، تمام هو فيه مشاهد فعلا مقرفة ولكنها مش بالشكل الفظيع اللي كانوا بيوصفوه، واصلا مش هتشوف منها حاجة اساسًا
ده غير انه مسلسل من نوعية اللي هو تشوفه مرة وخلاص، هو مش مسلسل جاي يرفه عنك، الأحداث قاسية والأسوء انها حصلت بجد، فـ كون المسلسل جامد على مستوى الكتابة والاخراج والتمثيل لا يعني انه مسلسل مفضل او ممكن اشوفه تاني مثلًا وده في رأي انا.
* * *
مكانش عندي اي توقع لما بدأت اشوف المسلسل، ومع بداية الحلقة الاولى كنت متوقع انه مثلًا بادئ القصة من النص وهنكمل معاه ونرجع فلاش باك وكدة ولكن اتفاجئت ان المسلسل بادئ من نهايته، المسلسل بادئ مع بداية نهاية جيفري دامر لما اتقبض عليه، وهنا بنرجع فلاش باك لطفولته ومراهقته واللي هو بيحكيها للمحققين وبنشوف اكثر من منظور زي منظور والده وجارته
في مقالة قديمة هنا في الكتاب عن فيلم Sound of metal، كنت اتكلمت فيها عن حوار المنظور، وانه كان مثلًا بيوري القصة للمُشاهد من منظور البطل ومرة من منظور غير البطل، والحوار ده كان جميل جدًا
المسلسل 10 حلقات وتقريبًا عند الحلقة الخامسة هتبدأ تحس ان خلاص كل حاجة اتحكت ولكن برضه المسلسل بيفاجئك لما بيبدأ ينقل المنظور لأفراد تانية، اهالي الضحايا، الجارة، احد ضحاياه بالفعل، وبيبدأ يستعرض حاجات زي الإهمال لإن مش بس دامر هو القاتل، هو اه القاتل.. بس اهمال الشرطة وقتها والعنصرية حاجة ساعدت في ده
* * *
بعيدًا عن قد ايه المسلسل كان بيحاول يحكي الاحداث الحقيقية ويصورها زي ما حصلت ولكن مع ذلك كان في تغييرات عشان الدراما، اول التغييرات دي واهمها هي الجارة..
جارة جيفري دامر اللي كان اسمها (جليندا كليفلاند) في المسلسل (اللي ساكنة في الشقة اللي جنبه) هي في الواقع كانت ساكنة في عمارة تانية جنب مبنى اكس فورد اللي فيه دامر، ولكن جارته الحقيقية اللي كانت في الشقة اللي جنبه، هي اللي كان جيفري دامر قدم لها ساندويتش.. وكلته! ولحد دلوقتي هي مش عارفة كان ساندويتش لحم عادي ولا لحم بشري.
صناع المسلسل عملوا مزج بين الشخصيتين، شخصية الجارة اللي في الشقة اللي جنبه وشخصية الجارة اللي في العمارة اللي قصاده، ومعرفش هل حوار الشكوى من ريحة الجثث دي كانت حقيقية ولا من المسلسل ولا ايه، ولكننا شوفنا في المسلسل انها مكالتش الساندوتش زي الواقع.
كمان من الحاجات اللي كانت مختلفة في المسلسل في الحلقة الخامسة او السادسة انه بدأ الحلقة من منظور ضحية وهو (توني الموديل) بحيث يخلينا نتعلق بيها ونتعاطف معاها، وهل دامر هيقتله ولا لا
ودي برضه حاجة مش مؤكده واسبابها درامية، لان في الواقع جيفري دامر قتل الضحية دي عادي زي ما قتل الباقيين، وده اللي قاله دامر نفسه، قال انه عرف الشخصية دي قبل ما يقتلها بيوم، لكن فيه اتنين شهود واحد قال انه كان يعرف توني قبل سنة وحد قال قبل سنتين، فمفيش تأكيد اوي على ده.
كمان مثلًا الاخبار اللي بتتذاع المسلسل اغلبها مش حقيقي، اول مشهد في المسلسل خالص اللي كان خبر في التليفيزيون مش حقيقي، وكمان في حلقة من الحلقات جيفري بيكون شغال في مركز طبي تقريبًا، وبيشرب دم، في الواقع هو مشربوش، هو داقه فعلا ولكن بصقه بعدها وكان جربه على سطح المركز ده.
* * *
الخلاصة
المسلسل كان مفاجأة ومستواه الفني مرتفع جدًأ، مزيكا وتصوير واخراج وتمثيل وكتابة كلهم مستواهم عالي، قيمت المسلسل 9 من 10، مع ذلك المسلسل زي ما قلت فوق غير مفضل ومش عاوز اشوفه تاني
...
تم النشر لأول مرة في: 18.10.22
تعليقات
إرسال تعليق