تاريخ النشر لأول مرة: 7 فبراير 2022
ملحوظة: المقالة دي ليها علاقة بـ مقالة بعنوان (الفيلم اللي غير السينما للأبد) ضمن سلسلة (ستاشر ميلي)، حاولوا تقرأوها قبل دي عشان تفهموا الموضوع كامل لان الموضوع هيعجبكم جدًا. -لينك المقال-
* * *
سنة 1969 في شهر يوليو، هبط نيل ارمسترونج على سطح القمر.. ولكن.. هل ده حصل فعلًا!!!!!
قبلها بسنة في 1968 نزل فيلم مختلف من نوعية الخيال العلمي وتقريبًا هو اول فيلم خيال علمي يستعرض الفضاء بشكلها الحقيقي، والفيلم كان نصه الاول عبارة عن رحلة للقمر، وتم تصويرها بشكل عبقري، والفيلم كان من اخراج ستانلي كيوبريك.
وقت ما امريكا طلعت للقمر كان بديهي جداً ان ناس تكذّب اللي حصل ويقولوا ان ستانلي كيوبريك هو اللي عمل الفيديو ده وصوره كمان في مواقع تصوير فيلمه، ومن هنا خلينا ندخل في الموضوع.
لان بعد 11 سنة بعد الحدث ده ستانلي كيوبريك لمح كتير لحاجات خلت الناس لحد دلوقتي عمالة تشك ان فعلاً امريكا مطلعتش القمر وانها اشتغاله
* * *
خلينا متفقين ان تمام ناس كتير طلعت القمر وامريكا طلعت القمر اكتر من مره، بس انا هنا بتكلم عن لما امريكا طلعت القمر سنة 1969 بس
تمام؟
سنة 1980 نزل فيلم اسمه the shinning وهو فيلم رعب من اخراج وسيناريو ستانلي كيوبريك ومبني علي رواية بنفس الاسم من كتابة ستيفن كينج
الرواية مشهورة جداً واعتقد اغلبكم عارفها او حتي عدت قدامه وهي رواية بتتكلم عن كاتب قاعد مع اسرته في فندق لحراسته في فصل الشتاء بس الفندق ده حصل فيه جريمة قتل قبل كدة
الفيلم فيه اختلافات كتير عن الرواية، والاختلافات دي كان فيها التلميحات اللي انا قلت عليها
* * *
اولاً: الفندق
زي ما ذكرت فوق، الفيلم بيتكلم عن شخص قاعد مع اسرته في فندق والفندق ده حصل فيه جريمة قتل ومن الاخر مسكون، ولكن مش بس دي كل الحاجات، لان الفندق ده برضه مبني علي مقبرة للهنود الحمر
و... بالظبط، الفندق بيرمز لامريكا نفسها.. لان لو متعرفوش كريستوفر كولومبس لما اكتشف الامريكتين دخلهم وقتل كل سكانها الاصليين اللي هما كانوا الهنود الحمر ومن هنا اتكونت امريكا
اذاً خلينا متفقين كدة ان اي حاجة بتحصل جوا الفندق هي حاجة مقصود بيها امريكا من الاخر
ثانياً: الغرفة رقم 237
في اول الفيلم بيحذر واحد من ادارة الفندق ان جاك (البطل) وعيلته من انهم يدخلوا للغرفة رقم 237، عادي.. ولكن الغير عادي ان الرواية الاصليه لستيفن كينج كانت الغرفه فيها رقمها 217، يعني كيوبريك غير الرقم ل 237
طب ايه علاقة ده بالقمر؟
المسافة بين الارض والقمر هي 237 الف ميل
في احد مشاهد الفيلم واللي هو اول مشهد فيه الطفل بيحاول يدخل الغرفه رقم 237 وبيبقي خايف جداً، كان في المشهد ده بالذات لابس سويتر مرسوم عليه صاروخ ومكتوب عليه ابولو 11 واللي هي نفسها الرحلة اللي كان فيها نيل ارمسترونج سنة 1969
اذًا، الغرفه 237 اللي بترمز لرحلة القمر، هي غرفة موجودة في فندق بيرمز لامريكا، والغرفه دي بتخوف، ومن المرسوم علي السويتر فكوبريك بيدي تأكيد علي الرحلة دي بالذات.
يبقي من نظر ستانلي كيوبريك: الرحلة دي بالذات بتخوف امريكا لاسباب احنا منعرفهاش
* * *
هل هما الاشارتين دول بس هما كل الحوار؟، لا، فيه اشارات تانيه كتير وفيه نظريات مؤامرة وفيه موال عن الموضوع ده بس انا اخترت اهم اتنين
بعد كل اللي قولته ده بقي هل فيديو القمر ده متفبرك؟، بصراحة معرفش، المهم ان الهوهوز لسة مغليتش، وكمان فيه حاجة حابب اذكرها وهي ان كيوبريك كان كاره امريكا وسابها اصلاً وراح عاش في لندن وعمل كل افلامه من هناك لحد ما مات في اواخر التسعينات.. وموته ده واخر فيلم عليه موال كبير هو كمان
ده غير ان جايز جداً يكون كيوبريك بيلاعبنا، عادي هو لقي الموضوع مثير فقال يشتغلنا شوية..
تعليقات
إرسال تعليق