ثلاثة أفلام اوسكارية عشوائية | ستاشر ميلي

سنة 2022 كانت سنة مميزة سينمائيًا من حيث إنتاجاتها وأهمية الأسماء اللي اشتغلوا فيها، أفلام كتير حلوة نزلت في السنة دي، ممكن نقول إنها تقرب بشكل كبير لأخر سنة سينمائية رائعة قبل كورونا وهي 2019.

السنة ابتدت بعودة فيلم بجزء تاني بعد 36 سنة من جزئه الاول وهو Top Gun: Maverick، وانتهت بعودة فيلم بجزء تاني برضه بعد 13 سنة من صنعه وهو Avatar: The Way of Water، والاتنين حققوا إيرادات بالمليارات

من اسبوع تقريبًا تم الاعلان عن ترشيحات الاوسكار واللي ضمت 10 افلام: 

1. All Quiet on the Western Front

2. Avatar: The Way of Water

3. The Banshees of Inisherin

4. Elvis

5. Everything Everywhere All at Once

6. The Fabelmans

7. Tár

8. Top Gun: Maverick

9. Triangle of Sadness

10. Women Talking

وبما اني مشوفتش كل الافلام دي، فأنا حابب اتكلم عن 3 افلام منهم اثروا فيا بشكل كبير، وده مش معناه إن مش عندي مشاكل مع الافلام دي، ولكنها افلام فيها حاجة/حاجات عجبتني بشكل كبير

ملحوظة: مش هتلكم بحرق

ـــــــــ الفيلم الأول ــــــــــ

ممكن ابدأ مع الفيلم بفكرته بس، تخيل معايا كدة، انك صحيت من النوم وروحت لصاحبك وقولتله انا مش عايزك تبقى صاحبي، بس كدة. ايه السبب؟ ولا حد يعرف، هو كدة وخلاص

دي فكرة الفيلم، اتنين صحاب جدا عايشين في جزيرة اسمها Inisherin متعودين يروحوا الحانة ولامؤاخذة كل يوم الصبح. بيروح واحد يعدي ع التاني والتاني مبيتفاعلش معاه وبيقوله انه مش عايز يبقى صاحبه

قصة عبثية غريبة، اول ما هتسمعها هتشك هو ازاي هيطلع فيلم مدته معدية الساعة ونص من الفكرة دي اصلًا!! الاحداث هتتملي ازاي، ولكن بما ان الفيلم ده اخراج وتأليف مارتن ماكدونا فده مش غريب عليه

كنت ذكرت مارتن ماكدونا قبل كدة في مقالة (افلام متتفرجش عليها في العيد) من سنة ونص تقريبًا، فده معناه إن الفيلم ده كوميديا سودا برضه زي سابقة اعماله واللي هما 4 بس

الفيلم ده عظيم في كل حاجة، من اول مشهد هتشدك مزيكته وشكل الجزيرة بس، وبعدها التمثيل الجامد والقصة والتصوير

حابب اغششكم معلومة ممكن تساعدكم وانتوا بتشوفوا الفيلم للي لسة مشافوش، فيها سيكة حرق فلو مش عايز تقرأها عديها للفيلم اللي بعده

||الفيلم هو مراية للي حصل في الحرب الايرلندية الأهلية||

ـــــــــ الفيلم الثاني ــــــــــ

اكتر اسم كريتيف ويشد بين كل افلام السنة اللي فاتت، (كل حاجة في كل حتة مع بعض في مكان واحد).. ده اسم الفيلم

اكتر فيلم معجبنيش.. بس في نفس اللحظة اكتر فيلم عجبني كل عنصر فيه!
تصوير ومزيكا وستايل والفكرة والقصة والشخصيات والتمثيل والمشاهد.. يا الهي فيلم عبقري.. بس معجبنيش برضه..

ده اكتر فيلم مش قادر اصنفه، فيلم عجبني، وفي نفس الوقت معجبنيش ومليت كتير وانا بشوفه، حتى لما اجي اعترض على الملل بلاقي ان الفيلم ايقاعه سريع فملل ازاي!!، ولما بقول طب السرعة خلتني مش قادر اواكب، فهل كان ممكن يكون ابطأ!، لا برضه هو كدة مظبوط جدًا.. ايه الفيلم ده!! الفيلم فعلًا مش ممل، ولكن بيدخل كم معلومات لدماغك هيخليك تتوه.

الفيلم عن ايه؟ واحدة اربعينية جادة عندها مغسلة ورايحة تخلص الضرايب اللي عليها، وهناك بتقابل جوزها بس من عالم موازي، وبيقولها انه اختارها عشان تنقذ الكون. فيلم من افلام العوالم الموازية متقسم على 3 فصول، الفصل الأول Everything، الفصل التاني Everywhere، الفصل التالت All At Once

الاتنين اللي اخرجوا وكتبوا الفيلم هما دانيالز، واللي ميعرفهومش فهما اعمالهم كلها جنان زي فيلم Swiss Army Man ده غير شغلهم في الميوزيك فيديوز. اسلوبهم قريب من Safdie brothers عمومًا. الفيلم من انتاج شركة A24 وهي شركة انتاج لأفلام مستقلة انتاجاتها دايمًا غريبة نوعًا ما ومميزة زي Midsommar وGood time.

الفيلم ستايله جامد، ودي اول حاجة اي حد هيلاحظها، تمثيل ومزيكا والافكار المجنونة الجامدة والمشاهد، الاكشن رهييب والمؤثرات البصرية، واللي حرفيًَا عملها 5 اشخاص منهم الاتنين اللي اخرجوا الفيلم، يعني مش شركات ضخمة وميزانيات، لأ، اماكنيات بسيطة مع ذلك كانت النتيجة مميزة.

مش هقدر انهي الكلام عن الفيلم من غير ما اذكر اكتر مشهد عجبني في الفيلم، وهو لصخرتين بيكلموا بعض.. بالظبط.. صخر بيتكلم..

اخيرًا، الفيلم اترشح لـ 11 جايزة اوسكار، وقيمه اكتر من 1.3 مليون مستخدم في موقع ليتربوكسد بمتوسط تقييم 4.4 من 5، وفيه اكتر من 500 الف مستخدم قيم الفيلم 5 من 5. الجدير بالذكر ان عدد المستخدمين اللي قيموا الفيلم في موقع IMDB كانوا 350 الف بس تقريبًا، بمتوسط تقييم 8 من 10.

واحد من اكتر حالات المشاهدة الغريبة عندي، لازم تشوفوه بنفسكم.

ـــــــــ الفيلم الثالث ــــــــــ

اكتر فيلم عجبني في 2022.. نقطة. (اسكندرية ليه؟) نسخة ستيفن سبيلبيرج.

سواء تعرف ستيفن سبيلبيرج او لأ، فأنت أكيد تابعت ع الأقل واحد من أفلامه.. 

1. Jaws
2. Saving Private Ryan
3. Jurassic Park
4.  E.T
5. Catch Me If You Can

في الفيلم ده ستيفن سبيلبيرج بيحكي قصة ازاي اتعرف على السينما في طفولته، مرورًا بفترة مراهقته، من الأخر كل الأحداث اللي قبل ما سبيلبيرج يدخل عالم صناعة الأفلام. الفيلم ده في الأول حسيت انه شبه Cinema Paradiso، الفيلم الايطالي اللي كان بيتكلم عن قصة حد بيحب السينما برضه ومخرج. لكن الفيلم ده على العكس فيه قصة هتلمس الكل، لأنه مش مجرد واحد بيحب السينما.

لأ.. السينما كانت سبب في انه يكتشف اكتشاف عن عيلته والاكتشاف ده ممكن حرفيًا ينهي عيلته. مش حابب احرق للي مشافش الفيلم. ولكن الفيلم هيعجب جدًا اي حد بيحب السينما ومتأثر بيها.

الفيلم قصة حقيقية بالتأكيد لانها قصة سبيلبيرج نفسه، هو في الفيلم مغير اسمه مخليه (سامي فايبلمين)، زي ما يوسف شاهين غير اسمه لـ يحيى في اسكندرية ليه.

مش محتاج اقول ان الفيلم عبقري في كل عناصره، فيلم متقفل مُحكم ممتع، وكل الصفات الايجابية اللي في الكوكب، اكتر فيلم انصحكم تشوفوه، لأن نهايته من اكتر النهايات اللي حبيتها في افلام السنة، نهاية كدة هتخليك مبسوط لمدة لا  تقل عن اسبوع بعد الفيلم. حتى لو الكوكب ولع.. النهاية دي هتنسيك...

والى لقاء اخر..
7 فبراير 2023