تاريخ النشر لأول مرة: 7 فبراير 2022
2001: A Space Odyssey
سنة 1968 نزل فيلم من اخراج ستانلي كيوبريك وكتابته بمشاركة ارثر كلارك، والفيلم ده هو 2001: A Space Odyssey، الفيلم اللي مش هتقتنع انه نزل في الستينات، كونه اول فيلم خيال علمي حقيقي في تاريخ السينما
الفيلم صور الفضاء بشكل عبقري في زمن كانوا فيه لسه بيسكتشفوا المؤثرات البصرية، ومش بس كدة.. الفيلم فيه مواضيع عن الذكاء الاصطناعي والمستقبل، حرفيًا مواضيع احنا حاليًا بنتكلم فيها وبالنسبة لنا جديدة!
الفيلم بشهادة علماء كتير وقتها قالوا انه صور الفضاء بشكله الحقيقي لان النسب فيه مظبوطة جدًا بشكل لا يتخيل.
ستانلي كيوبريك واحد من افضل المخرجين في تاريخ السينما، بالرغم من كدة معملش غير 13 فيلم طويل بس، ولكن كل فيلم هو تحفة فنية ومنهم فيلم 2001
فيه مقالة هنا اسمها (فيلم نابليون اللي متعملش) اقرأوها برضه عن احد افلام كيوبريك اللي متعملش
* * *
الفيلم ده بيتكلم عن ايه بقى؟
الفيلم ده مختلف جدًا، فيلم عنصر الحوار فيه قليل، بتدور احداثه في الفضاء، التجربه البصرية فيه جبارة مع مزيكا كلاسيكية، فيلم تأملي بتتحكي قصته بالصورة في اغلبه
الفيلم لما نزل بسبب انه كان مختلف جدًا محدش فهمه، واللي كانوا بيدخلوه في السينما هما اللي كانوا بيشربوا مخدرات لانهم كانوا بيحسوا ان الفيلم ده بيزود نشوتهم!، ده حتى المخرجين زي وودي ألين مثلًا كان شايف ان الفيلم ده محبط جدًا ومش حلو، ولكنه غير رأيه في السبعينات لما شافه تاني عشان يقول ان الفنان اللي عمل الفيلم ده قد ايه كان اذكى مننا كلنا لدرجة اننا مفهمناش الفيلم.
الفيلم من نوع الغموض والاثارة، قصة الفيلم مقسومة نصين، النص الاول بنكون مع رحلة فضائية للقمر بسبب انهم بيستقبلوا اصوات واشارات غريبة من هناك ورايحين يشوفوا فيه ايه هناك
والنص التاني بنكون في رحلة فضائية للمشتري واتنين علماء قاعدين مع ذكاء اصطناعي وهنا عنصر الاثارة بيظهر في الفيلم.. اه.. ذكاء اصطناعي.. سنة 1968!
الفيلم بتدور احداثه في المستقبل البعيد ما بين سنة 1999 و2001، ده بالنسبه لهم طبعًا، يعني احنا حاليًا في المستقبل البعيد
* * *
تعالى نقفز قفزة زمنية لعام 2014، لما نزل فيلم Interstellar
الفيلم ده كان خيال علمي وفي الفضاء برضه، بس كان اخراج كريستوفر نولان وكتابته مع اخوه جوناثان نولان
نولان كان متأثر بفيلم 2001 واتفرج عليه وهو صغير، وأحد اكتر افلامه المفضلة، ولذلك لو انت اتفرجت على interstellar و a space odyseey هتلاقي تشابهات بين الفيلمين
طبعاً الفيلمين مختلفين، بس هتلاقوا تشابه في افكار معينه، زي ان في فيلم 2001 كان فيه تساؤل حوالين حجر اسود اللي كان سبب في تطوير البشر، ومين اللي حطه ليهم، وفي interstellar كان فيه تساؤل برضه حوالين ثقب اسود واللي هينقذ البشر ومين اللي حطه ليهم عشان ينقذهم، ده غير ان في اخر الفيلمين البطل بيدخل مكان كله الوان وغريب، في انترستيلر ده كان البعد الخامس.
نولان كان حالف طلاق انه لازم الفيلم يطلع مظبوط علميًا زي 2001، فإستعان بعالم فيزيائي طول الفيلم عشان كل حاجة تكون صحيحة علميًا، نولان عمومًا في كل لقائاته كان دايمًا بيجيب سيرة كيوبريك وفيلم 2001 وقد ايه هو كان متاثر بالفيلم وبكيوبريك
* * *
تعالوا نرجع بالزمن لسنة 1969 بقي، للوقت اللي امريكا طلعت فيه القمر لان فيه كلام كتير نقوله هنا، بس كدة المقالة هتطول
ولذلك، انا هكمل الموضوع ده ضمن سلسلة (هولوجرام) -لينك المقال-
ولكن عشان أنهي المقالة دي، فيلم 2001 كان فيلم ثوري غير شكل أفلام الخيال العلمي من وقت عرضه، ولو مشوفتوش لازم تشوفه، انا مش جاي احلل الفيلم وعشان كدة محرقتوش ولكن جاي اكتب المقالة دي في حب الفيلم مش اكتر.
تعليقات
إرسال تعليق