تاريخ النشر أول مرة: 11 فبراير 2022
في اواخر عام 2021 (اعتقد يعني. بصراحة مشوار البحث لجوجل ده مرهق) المهم، نتفليكس نزلت فيلم جديد بعنوان the guilty
هتقولي طب ايه المشكلة
بصراحة مفيش مشكلة، بس في نفس الوقت فيه مشكلة
فيلم the guilty في الاساس هو فيلم دينماركي نزل في 2018 ونتفليكس خدته وعادت انتاجه لان في امريكا مش بيشوفوا افلام بترجمة زينا كدة، لازم يكون الفيلم ناطق بالانجليزي او مدبلج يأما مش هيشوفوه
الفيلم لما نزل الاعلان بتاعه كنت متحمس لانه بطولة ممثل انا بحبه زي جيك جيلينهال، بس لما سمعت عن الفيلم الدينماركي.. رأي اتغير 180 درجة
فيلم نتفليكس كل اللي شافوه بيقولوا حلو، بس كل اللي شافوا الفيلم الدينماركي بيقولوا الفيلم الدينماركي احسن وانا منهم، الفيلم الدينماركي احسن بكتير من فيلم نتفليكس، ومع ذلك فيلم نتفليكس مش وحش، ولكن الدينماركي احلي بكتير
وعشان كدة النهاردة انا جاي اكلمكم عن فيلم the guilty الدينماركي مش بتاع نتفليكس
* * *
الفيلم بيتكلم عن ظابط شرطة متعاقب، والعقاب بتاعه انه يكون موظف استقبال لمكالمات الطوارئ، وفي يوم بيجيله اتصال من ست بتكلمه علي انه بنتها، وهو بيعتقد انها سكرانة او اي شئ مشابه بس قبل ما يقفل المكالمه، بيلاقيها انها عارفة انها مش بتكلم بنتها، ومن هنا بيقدر يعرف انها مخطوفة
وبس كدة، الفيلم كله انتوا جوا مكتب (اه انت)، مع الظابط ده بتحاولوا تنقذوا الام دي
الفيلم ده اكتر فيلم هتشغلوا فيه خيالكم ولا كأنكم بتقرأوا رواية، لان حرفياً انتوا طول الفيلم مع الظابط بس، الظابط نفسه مقيد وميقدرش يطلع بره المكتب وانتوا كذلك مقيدين معاه
فأي اي حاجة بتحصل خارج الغرفه انتوا بتتخيلوها، المخرج مش هيوريهالكم
ودي بقي احد الجرائم اللي عملتها نتفليكس في النسخة بتاعتها، وهي انها لغت عنصر الخيال ده، هي عملت جريمة تانيه في اخر الفيلم بس مش هقولك عشان محرقش
الفيلم مدته تعتبر صغيره، ساعه 25 دقيقه بس
بس ده حرفياً اكتر فيلم انا فضلت مشدود وانا بتفرج عليه، الفيلم رهيييب، وطول ما انت بتتفرج عمال تكتشف وتجمع الامور ببعض، الفيلم مليئ بالمفاجئات، ولكن للاسف كئيبة
حرفياً بعد الفيلم ده انت محتاج تحلي بفيلم كوميدي، عشان في الاغلب مودك هينزل بعد ما الفيلم يخلص بسبب احداثه، واللي هي تاني، انت مبتشوفهاش لكن بتتخيلها
* * *
لو عندكم اي فرصه تشوفوا الفيلم ده لازم تشوفوه، ولو اتفرجتوا علي نسخة نتفليكس فإنتوا فاتكم كتير، بس تتعوض عادي اتفرجوه برضه
تقييمي للفيلم، 9/10
تعليقات
إرسال تعليق