تاريخ النشر أول مرة: 15 مايو 2021
سنة 1996 نزل فيلم غريب اسمه From Dusk Till Dawn، فيلم معتقدش فيه في الكوكب شبهه، مع ذلك في نفس الوقت الفيلم مش غريب ابدًا لمتابعين ومحبي مخرج ومؤلف الفيلم ده.
الفيلم اخراج ومونتاج روبرت رودريجز، وسيناريو وبطولة كوينتن تارانتينو (ايوه هو مخرج برضه) والاتنين كمان منتجين تنفيذين في الفيلم.
-على اليمين كوينتن تارانتينو وعلى الشمال روبرت رودريجز-
بيشارك في البطولة برضه جورج كلوني واعتقد الاغلب عارفين مين هو جورج كلوني يعني.
اولاً: قصة الفيلم: -من غير حرق-
بصراحة انا مش عارف احكي قصة الفيلم ده ازاي، لان الفيلم تحسه جزئين، الجزء الاول هو فيلم جامد جداً ياخد 5/5 وفيلم طبيعي جداً مع بعض الحاجات الغريبة بس مش زي النص التاني، النص التاني بقي هو اللي بيحصل فيه كل الحاجات الغريبة.
وكنت اتمني اني لما اتفرج علي الفيلم مش ابقي عارف اي حاجة عن النص التاني، كنت حابب اعرف ردة فعلي على الغرابة اللي في النص التاني
لذلك.. انا هتكلم بس عن النص الاول من الفيلم ومش هجيب اي سيرة عن النص التاني وياريت متبحثش عن الفيلم وادخل اتفرج عليه على طول بدون اي مقدمات، اتفاجئ احسن بالنص التاني وغرابته بدل ما تكون عارف حاجة منه مسبقًا.
الفيلم بيحكي قصة اخين مجرمين (كوينتن تارانتينو وجورج كلوني)، اللي بعد مجموعة من الجرائم بيقرروا يهربوا للمكسيك بانهم يخطفوا شاحنة، لكن الشاحنة دي بيكون فيها اب مع ابنه وبنته.. قصة بسيطة عادية، ولكن مستحيل تكونوا شوفتوا حاجة زي كدة قبل كدة.
تصنيف الفيلم اكشن وجريمة ورعب، ولكن في رأيي الرعب اللي في الفيلم ده غير اي رعب تاني ممكن تكون شوفته في حياتك، بحكم إن صانعين الفيلم هما رودريجز وتارانتينو، وطبعاً الفيلم +18 يعني مش محتاج اقول
ومتنساش، انا محكتش حاجة عن النص التاني من الفيلم بيحصل فيه ايه..
* * *
ثانياً: اسلوب المخرج روبرت رودريجز (عشان لما تشوف الفيلم متتفاجئش)
مبدأيا كدة خلينا نقول ان روبرت رودريجز مخرج جامد ولكنه بيحب شكل معين من الافلام، اللي هي الافلام اللي كانت بتتعرض في السبعينات وبالأخص افلام الدرجة التانية. بتتميز الافلام دي بإن بتكون المؤثرات البصرية فيها ضعيفة واحيانًا اوفر، بالاضافة لمشاهد اكشن كتير واوفر برضه، فلو حسيت ان الفيلم اووووووفر.. عادي هو اوفر فعلًا وبالذات في النص التاني.
وبالمناسبة رودريجز هو اللي اخرج فيلم Alita: Battle Angel اللي نزل في 2019، والفيلم كان جامد في المؤثرات البصرية، فده دليل على انه قاصد ان المؤثرات تطلع بالشكل ده زي افلام السبعينات مش حوار انه مش عارف يعملها او نفذها بشكل ضعيف
من الاخر الفيلم ده اللي عاملينه عارفين بيعملوا ايه كويس، فلو حسيت انه اوفر فهما قاصدين ده، ممكن يعجبك اسلوبهم وممكن لا.
وبالمناسبة الجنان زاد بعدها ب 11 سنة في ٢٠٠٧ لما كوينتن تارانتينو ورودريجز كل واحد فيهم اخرج وكتب فيلم لوحده من نوعية افلام الدرجة التانية دي، وعرضوهم ورا بعض في السينما زي ما كان منتشر في افلام السبعينات باسم Double Feature.
ومش بس كدة، في السبعينات كان بيتعرض اعلانات افلام تانيه ما بين الفيلمين، فاستعانوا باصدقائهم وعملوا اعلانات لافلام وهمية عشان تتعرض بين الفيلمين، وياريت بس كدة كمان ده كانت الافلام دي عادةً بسبب انها رديئة كان بيبقي فيها مشاهد بايظة، فاللي عملوه هو انهم بوظوا اكتر من مشهد في الفيلم علشان تكون شبه افلام السبعينات. يعني جابوا سجاير وطفوها في الفيلم الخام وبقوا قاصدين يتلفوا الخام عشان يدي نفس تأثير الافلام القديمة.
يعني وانت بتتفرج هتحس ان فيه مشاهد محذوفة كتير وهتحس ان فيه حاجات غريبة بتحصل، وده هما قاصدينه لان ده اللي كان بيحصل في افلام السبعينات.
المهم نرجع لفيلمنا الاساسي، فيلم ممتع لأي حد بيحب شغل تارانتينو ورودريجز، وتقييمي ليه 4/5.
تعليقات
إرسال تعليق