تاريخ النشر أول مرة: 7 سبتمبر 2021
* * *
إم. نايت. شيامالان
مخرج وكاتب سيناريو امريكي من اصول هندية اشتهر بافلام الرعب، تاني فيلم ليه في كاريره كان the sixth sense، وده الفيلم اللي خلاه يشتهر والناس تعرفه لانه كان فيلم رعب غريب ومختلف. نزل الفيلم سنة ١٩٩٩ واترشح بسببه شيامالان لاوسكار افضل سيناريو اصلي..
في سنة ٢٠٠٠ وبعد نجاح فيلم شياملان نزل فيلمه الثالث وهو unbreakable
كان فيلم بيتكلم عن شخص اسمه (إليجاه برايس) اللي بيقوم بدوره صامويل جاكسون، شخص بيعاني من مرض بيخلي عظامه اشبه بالزجاج وسهلة التكسير.. وبسبب ده كان بيقضي اغلب طفولته في المستشفيات وعشان كدة كان بيقرأ قصص مصوره كتير، ومن هنا كونت الشخصيه دي نظرية من كل القصص المصوره اللي قرأتها وهي ان لكل شي نقيض ليه..
فمثلا لو فيه شخص زيه ضعيف وعظامه بتتكسر فأكيد فيه نقيض ليه قوي جدا وخارق (غير قابل للكسر)
ومن هنا بندخل للفيلم لان بعد سنوات ولما بتكبر الشخصيه دي (إليجاه برايس) بتكتشف من الاخبار ان فيه حادث قطار مات كل اللي فيه ماعدا واحد بس مش حصله ولا خدش واحد.. ومن هنا بيبدأ يتواصل مع الشخص ده واللي اسمه (ديفيد دن) اللي بيقوم بدوره بروس ويليس لانه بطل خارق ونقيض ليه.
* * *
شخص اسمه كيڨن بيعاني من انفصام وجواه ٢٣ شخصية، بس المشكله الاكبر انه بيخطف ٣ بنات و بيبدأ يحصله صراع داخلي وال٢٣ شخصيه بيبدأو يختلفوا على مصير الثلاثة بنات ايه، بالتوازي مع ان البطل على وشك اطلاق الشخصية ٢٤ وهي the beast او الوحش..
المهم ان بشكل مفاجئ بعد تتر الفيلم بنسمع مزيكا فيلم unbreakable وبنشوف مشهد
اضافي بعد التتر لشخصيات قاعده بترغي في كافيه وبيقولوا ان اللي حصل ده غريب
وانه شبه اللي حصل من 15 سنه وكان شخص كده مش فاكرين اسمه.. وفجأه بتظهر شخصية
(ديفيد دن) جنبهم واللي هو كان الخارق في فيلم unbreakable وبيقولهم اه كان
اسمه Mr. Glass!! (مستر جلاس هو اليجاه برايس)
شوف المشهد من هنا + موسيقى فيلم unbreakable
المشهد ده قلب الدنيا وقتها في 2016... لان اصلا فيلم split مش اتسوقلوا انه جزء تاني ل unbreakable والكل كان داخل الفيلم على اساس انه فيلم عادي لشيامالان ولكن كانت المفاجأة بعد تتر الفيلم انه عبارة عن جزء ثاني و بكده شياملان بيوضح ان الفيلمين موجودين في نفس العالم ودلوقتي عندنا شخصية ضد الكسر وشخصية بتتكسر بسهوله وشخصية تالته عندها ٢٣ شخصية جواها.
بالمناسبة ام نايت شياملان كان من البدايه عايز يحط شخصيه كيفن من فيلم split
في فيلم unbreakable ولكنه حس ان الشخصيات كتير ومش راكبة فحذفه.
وعشان كده في فيلم unbreakable هتلاقي مشهد لولد بيودع امه في نفس القطر اللي
عمل حادثة وده ناس كتير فسرته ان الطفل ده هو كيفن وانه حصله انفصام لان امه
كانت في نفس القطر اللي عمل حادثة.
من الحقائق المثيرة للأنتباه ان حركة انك تكتشف ان الفيلم/المسلسل اللي بتشوفه هو جزء تاني لحاجة قديمة اتكررت في نفس السنة (2016) مع مسلسل مصري اسمه (القيصر) وكان بطولة يوسف الشريف، ولحسن الحظ انه اتعرض في رمضان قبل ما الفيلم ينزل. لان لو كان حصل العكس كان المسلسل فورًا هيُتهم بأنه سارق فكرته من فيلم لسة نازل من كام يوم. مع ذلك ليه منقولش ان شيامالان سارق الفكرة من المسلسل! بالرغم من ضعف جودة المسلسل بس كانت الفكرة جيدة.
* * *
فيلم Signs هو احد افلام ام نايت شياملان برضه واللي كان بيتكلم عن غزو كائنات غريبة للأرض، فيلم حلو نوعًا ما، بس هل شخصيات الافلام التانية كانت موجودة في نفس العالم واتأثرت بالغزو؟!
* * *
المهم، في 2019 بالفعل شفنا فيلم بيجمع 3 شخصيات وهما (كيفن) و(اليجاه) و(ديفيد دن)، ابطال فيلم Split وUnbreakable. الفيلم كان اسمه Glass، وكان المتمم لثلاثية تجمع الفيلمين المذكورين ولكن للاسف الفيلم كان مخيب للامال ومكانش حلو.. (ده رأي انا، ممكن يعجبك عادي). مع ذلك الأفلام الباقية كانت حلوة ولازم تتفرج عليها لو متفرجتش.
تعليقات
إرسال تعليق